Vrijdag 21 december 2018 – Tweede Herenteam Kamphuis
Allo Lui,
Dit keer een stukkie van de olde skriever. ’tMos maar weer iens gebeur’n.
“t eer’n 2 ploegien mos zie’n patiegie speul’n teg’n WSV , Die kom’n uut Apeldoorn.
Ons Ploegie bestiet uut Gerard Thomassen, Hand Booij, Mark Veldman en Willem Burger.
Nouja Gerard hef alenig de eerste keer espeuld. Toen kreeg e wat met zien voet. Dat don em zo zeer dat e niet meer kon speul’n.
Doarumme dutt er steeds een invaller met.
Dit keer gonk Thomas Koopman met.
Gerard zol oak met, um ons te zegg’n wat wie in de wedstrijd ’t beste konn’n doen. Dat nuumt ze met een muulek woord ‘coachen’.
Maa Gerard zei teg’n Mark dat ij toch niet met gong . Hij vuul’n zich niet goed van passe, ‘ij had ’s nachens hoaste niet ‘esloap’n.
We heb in ons ploegie de afsprake dat wie ’s ovvens veur de wedstrijd geen gekke ding’n zult doen. Maar ai een keer niet kunt speul’n muj je natuurlijk wel an die regel ‘oll’n Gerard.
Nouja, Karin was wel mee umme ons te steun’n.
Ok was Bert van Zweden een olde bekende van ons er. Maar ij is noe de trainer van WSV, dus doar hadd’n wie ok niet veule an.
Wie moss’n eigelijk in De Kamphal speul’n, maar umdat wie zoveule trammelant hadd’n met invallers moss’n wie weer in Apeldoorn speul’n.
Wie begonn’n met de dubbels, Hans en Thomas wonn’n hun patiegie met 13 en 20 teg’n.
Mark en Willem kreg’n dat niet veur mekaar en verleur’n.
Thomas kon ’t niet redd’n in zien enkelspellegie. ‘ij verleur in de 3e set met 20-15.
Hans mos wel goed zie’n best doen, maar ij won met 2x 17 teg’n.
Mark verleur okke. ‘ij was an ’t renn’n en vlieg’n, maa kon ’t niet veur mekare krieg’n.
Willem maak’n een beste pot, maar gonk toch onderut in de 3e set met 17 punt’n.
Maar zien teg’nstander had ’t goed veur mekare, want Bert van Zweden wet wel heeel goed hoe Willem het spellegie speult en dat kreeg ij allemoale te heur’n van Bert.
‘et was dus niet zo best veur ons 4-2 achter.
Wie most’n nog stevig an de bak.
Eerst de beide jonkies Thomas en Mark. Zie maakt’n er een mooi puttie van en wonn’n in de 3e set met 21-16.
Ja en dan konn’n de olle lui ok niet achter bliem. En deuromme was ’t mooi dat Hans en Willem ok in een 3-setter met 21-16 wonn’n.
Toen war’n de punt’n mooi verdeeld met 4-4.
De ronde in de kantine heb’n wie wel ewunn’n. Om half iene vreug’n ze ons of wie ‘et licht uut wil’n doen en de tente wild’n slut’n. Nou toen binn’n wie maa weg-egoan.
De beste wens’n veur oe all’n met de Kerstdag’n en een geukkig Nie joar.
De Olde Skriever